भैरहवा । सशस्त्र प्रहरी बल नेपाल सीमा सुरक्षा गुल्म हेडक्वाटर डण्डा, रूपन्देहीले पछिल्लो डेढ महिनाको अवधिमा साढे १ करोड रुपैयाँभन्दा बढीको अवैध सामान बरामद गरी भन्सार कार्यालय बुझाएको छ । गुल्मका प्रमुख सशस्त्र प्रहरी नायव उपरीक्षक गोपिकृष्ण भट्टराईले कार्यभार सम्हालेयता सीमा क्षेत्रमा निगरानी र सक्रियता बढाएसँगै ठूलो परिमाणमा तस्करीका सामान पक्राउ गरिएको हो ।
गत जेठ ८ गते गुल्मपतिको रूपमा डिएसपी भट्टराई हाजिर भएयता रूपन्देहीका विभिन्न सीमा नाका र स्थानहरूबाट अवैध रूपमा भन्सार छली भारतबाट नेपालतर्फ ल्याउँदै गरिएका लत्ताकपडा, हार्डवेयर, कस्मेटिक तथा किराना सामानहरू बरामद गरिएको सशस्त्र प्रहरीले जनाएको छ । यसैगरी, विभिन्न समयमा बरामद गरिएका फलफूल, पेय पदार्थ तथा मेसिनरी सामानसहित कुल १ करोड ७० लाख ६१ हजार १४६ रुपैयाँ बराबरको अवैध सामान आवश्यक कारबाहीका लागि भैरहवा भन्सार कार्यालयमा बुझाइएको छ ।
सीमा सुरक्षा र अवैध ओसारपसार नियन्त्रणका लागि चालिएको कडा कदमका क्रममा सशस्त्र प्रहरीले प्रतिबन्धित लागुऔषध समेत बरामद गरेको छ । सोही अवधिमा सीमा क्षेत्रबाट ७ केजी गाँजा र २.७९ ग्राम चरेस समेत नियन्त्रणमा लिई आवश्यक कानुनी प्रक्रिया अगाडि बढाइएको सीमा सुरक्षा गुल्म डण्डाले जनाएको छ । सीमा क्षेत्रमा हुने गस्ती र चेकजाँचलाई थप कडा पारिएसँगै अवैध सामान भित्रिने क्रममा कमी आउने विश्वास लिइएको छ ।
