बुटवल । नेपाल पत्रकार महासङ्घ रुपन्देहीको समन्वयमा उत्कृष्ट वातावरण पत्रकारिता पुरस्कार स्थापनालाई पुनः निरन्तरता दिने भएको छ । अग्रज पत्रकार नारायणप्रसाद सापकोटाले जलवायु, वातावरण तथा पर्यावरण क्षेत्रमा कलम चलाउने एक जना पत्रकारलाई वार्षिक रु २५ हजार नगदसहित पुरस्कृत गर्नेगरी कोष स्थापना गर्नुभएको छ । सापकोटाले प्रत्येक पाँच वर्षका लागि पुरस्कारका लागि हुने एकमुष्ट रकम रु एक लाख २५ हजार जम्मा गरिदिनुभएको हो ।
सापकोटाकै सहयोगमा विसं २०७३ देखि निरन्तर वितरण हुँदै आएको उक्त पुरस्कारका लागि स्थापना गरिएको कोषबाट प्राप्त हुने ब्याजबाट पुरस्कार वितरण गर्न सम्भव नभएपछि केही समय रोकिएको थियो । नेपाल पत्रकार महासङ्घका संस्थापक केन्द्रीय सदस्यसमेत रहनुभएका सापकोटा र पत्रकार महासङ्घ रुपन्देहीका अध्यक्ष दिनेश पाण्डेले उक्त पुरस्कारलाई पुनः निरन्तरता दिनेगरी सम्झौतापत्रमा हस्ताक्षर गर्नुभएको हो । पुरस्कार कोषका लागि अग्रज पत्रकार सापकोटाले पाँच वर्षको रकम एकमुष्ट रु एक लाख २५ हजार पत्रकार महासङ्घको संयुक्त खातामा जम्मा गर्नेगरी चेक हस्तान्तरण गर्नुभएको थियो ।
उक्त पुरस्कार हरेक वर्ष विश्व वातावरण दिवसको अवसर पारेर वातावरण, जलवायु परिवर्तन र पर्यावरणको क्षेत्रमा कलम चलाउने एक जना पत्रकारलाई वितरण गरिने नेपाल पत्रकार महासङ्घ रुपन्देहीले जनाएको छ । विश्वको वातावरण मानवीय जीवनका लागि चुनौतीपूर्ण बन्दै गएको अवस्थामा पत्रकारहरूले वातावरण, जलवायु र पर्यावरणको मुद्दा सशक्त रूपमा उठाउन प्रोत्साहन गर्न वातावरण पत्रकारिता पुरस्कार स्थापना गरिएको पुरस्कारका संस्थापक सापकोटाले बताउनुभयो ।
उक्त पुरस्कार प्रत्येक वर्षको वैशाख १ गतेदेखि चैत मसान्तसम्मको रिर्पोट, समाचार, फिचरलाई मूल्याङ्कन गरी वितरण गरिने गरी निर्देशिका तयार गरिएको महासङ्घका सचिव सिपी खनालले जानकारी दिनुभयो । पत्रकार महासङ्घले विसं २०७३ देखि वितरण गर्दै आएको उक्त पुरस्कार अहिलेसम्म शेरबहादुर केसी, छवि पाण्डे, लक्ष्मण पोखरेल, लक्ष्मण पौडेल, टिआर शर्मा, तेजेन्द्र केसी र दिनेश पाण्डेले प्राप्त गरिसकेका छन् ।
विसं २०२९ देखि पत्रकारिता सुरु गरेका पुरस्कारका संस्थापक अग्रज पत्रकार सापकोटाको सम्पादकत्वमा विसं २०३१ देखि २०६० सम्म मुक्ति सन्देश दैनिक भैरहवाबाट प्रकाशन गर्नुभएको थियो । विंस २०४७ देखि वातावरण बचाऊ आन्दोलनको अध्यक्ष भई काम गर्नुभएका सापकोटाको अगुवाइमा स्थापना भएको रुपन्देही एफएम सञ्चालन छ ।
