हेटौंडा । मकवानपुर प्रहरीले जिल्लाका विभिन्न स्थानबाट खैरो हेरोइन, गाँजा र ओनेरेक्स जस्ता लागू औषध सहित ६ जनालाई पक्राउ गरेको छ । विशेष सूचनाको आधारमा, जिल्ला प्रहरी कार्यालय मकवानपुरको टोलीले हेटौंडा उपमहानगर पालिका -४, कमलडाँडामा डेरा गरी बस्ने २४ वर्षीय दिल बहादुर सार्की र सोही ठाउँका २४ वर्षीय कुमार लोको कोठामा खानतलासी गर्दा ६ ग्राम ७२० मिलिग्राम खैरो हेरोइन बरामद गरेको हो । उक्त पदार्थ स्टिलको बाकसभित्र चप्पलमा लुकाएर राखिएको अवस्थामा फेला परेको थियो ।
त्यसैगरी, हेटौंडा-१५, रातोमाटे चेकपोइन्टमा चितवनबाट वीरगञ्जतर्फ जाँदै गरेको ना ६ ख ९५३३ नम्बरको बसमा जाँच गर्ने क्रममा दुई नाबालकलाई ९ किलो २०० ग्राम गाँजासहित नियन्त्रणमा लिइएको छ । उनीहरुले झोलामा उक्त गाँजा लुकाएर ल्याएका थिए ।
यस्तै, हेटौंडा-१०, सिमाचोकस्थित एक होटल अगाडि पार्किङमा रहेको ना २३ प ६८३७ नम्बरको मोटरसाइकलमा सवार दुई जनालाई प्रहरीले पक्राउ गरेको छ । पक्राउ पर्नेमा हेटौंडा-११ का ३० वर्षीय विशाल पौडेल र हेटौंडा-१२ का २९ वर्षीय पाल्डुव लामा रहेका छन् । उनीहरुको साथबाट १५ बोतल ओनेरेक्स बरामद भएको छ । पक्राउ परेका सबैलाई नियन्त्रणमा लिई लागूऔषध कसुरमा जिल्ला अदालतबाट म्याद थप गरी थप अनुसन्धान भइरहेको प्रहरीले जनाएको छ ।
