भैरहवा । आगामी फागुन २१ गते हुने प्रतिनिधिसभा सदस्य निर्वाचन नजिकिएसँगै रुपन्देही क्षेत्र नम्बर ३ मा नेपाली कांग्रेसका उम्मेदवार सुशील गुरुङले आफ्नो चुनावी अभियानलाई आक्रामक बनाएका छन् । गुरुङले मतदाताको घरघरमा पुग्ने 'घरदैलो अभियान' लाई तीव्रता दिएका हुन् । नेपाली कांग्रेस निर्वाचन परिचालन समिति रुपन्देही–३ का अनुसार, उम्मेदवार गुरुङ अहिले क्षेत्रका विभिन्न टोल तथा बस्तीमा पुगेर आफ्ना चुनावी एजेण्डासहित मतदाताहरुसँग प्रत्यक्ष भेटघाट र संवादमा व्यस्त छन् । घरदैलो कार्यक्रमका क्रममा उनले स्थानीय बासिन्दाका समस्या, गुनासा र सुझावहरु सुन्दै विकास निर्माणका कामलाई प्राथमिकता दिने बताएका छन् ।
मतदातासँगको संवादमा गुरुङले शिक्षा, स्वास्थ्य, रोजगारी र पूर्वाधार विकासमा आफू केन्द्रित हुने बताए । सुशासन र पारदर्शितालाई आफ्नो मूल मन्त्र बनाएको बताउँदै गुरुङले भने, ‘जनताको करको सही सदुपयोग गर्दै पारदर्शी र जवाफदेही नेतृत्व दिने प्रतिबद्धता व्यक्त गर्दछु । म यहीँको स्थानीय बासिन्दा भएकोले निर्वाचनपछि पनि सुख–दुःखमा जनताकै बीचमा रहेर काम गर्नेछु ।’ गुरुङले रुपन्देही–३ को विकासका लागि स्पष्ट खाका समेत प्रस्तुत गरेका छन् ।
उनले गौतमबुद्ध अन्तर्राष्ट्रिय विमानस्थल (भैरहवा विमानस्थल) को पूर्ण सञ्चालन, सडक पूर्वाधारको विस्तार, वैज्ञानिक फोहोर व्यवस्थापन, कृषिको आधुनिकीकरण, युवा स्वरोजगार कार्यक्रम तथा गुणस्तरीय स्वास्थ्य र शिक्षा सेवालाई आफ्नो प्रमुख चुनावी एजेन्डा बनाएका छन् । कांग्रेसको घरदैलो अभियानमा स्थानीय नेता, कार्यकर्ता तथा समर्थकहरूको उल्लेखनीय सहभागिता रहेको छ । उम्मेदवार गुरुङ गाउँ–टोलमा पुग्दा मतदाताहरूले उत्साहजनक साथ दिँदै जितको शुभकामना दिएको परिचालन समितिले जनाएको छ ।
