भैरहवा । भैरहवास्थित गौतमबुद्ध अन्तर्राष्ट्रिय विमानस्थलमा लामो समयदेखि अन्तर्राष्ट्रिय उडान हुन नसक्दा विमानस्थल सुनसान बनेको छ। विमानस्थललाई पूर्ण क्षमतामा सञ्चालनमा ल्याउन स्थानीय व्यवसायी तथा विभिन्न संघसंस्थाहरूले पटक-पटक ज्ञापनपत्र बुझाउँदै सरकारलाई दबाब दिइरहे तापनि तत्काल कुनै उडान हुने सङ्केत देखिएको छैन।
नियमित उडान नै ठप्प रहेको अवस्थामा पनि विमानस्थल प्रशासनले दर्जनौँ कर्मचारीलाई करार तथा दैनिक ज्यालादारीमा भर्ना गरी मासिक लाखौँ रुपैयाँ तलब सुविधा उपलब्ध गराउँदै आएको छ। विमानस्थलका कार्यवाहक महाप्रबन्धक श्यामकिशोर शाहका अनुसार हाल विमानस्थलमा २४ जना करार र ६६ जना ज्यालादारी गरी कुल ९० जना ज्यालादारी तथा करारका कर्मचारी कार्यरत छन्। विमानस्थलमा १४१ जनाको स्थायी दरबन्दी रहेकोमा हाल ८१ जना स्थायी कर्मचारी मात्र कार्यरत रहे तापनि उडान अभावका कारण उनीहरूलाई नै पर्याप्त काम पुग्न सकेको छैन।
उडानविहीन अवस्थामा स्थायी कर्मचारीलाई समेत कामको अभाव भइरहेका बेला थप करार र ज्यालादारी कर्मचारी कायम राख्दा राज्यलाई अनावश्यक आर्थिक भार परेको सरोकारवालाहरूको टिप्पणी छ। उता विमानस्थल सञ्चालन हुने आशामा भैरहवा क्षेत्रमा निजी क्षेत्रबाट अर्बौँ रुपैयाँको लगानी भइसकेको छ। तर, विमानस्थल पूर्ण सञ्चालनका लागि सरकारले देखाएको उदासीनताका कारण स्थानीय व्यवसायी तथा लगानीकर्ताहरू दिनप्रतिदिन निराश बन्दै गएका छन्।
