भैरहवा । सशस्त्र प्रहरी अतिरिक्त महानिरीक्षक अञ्जनी कुमार पोखरेलले नवलपरासी, रुपन्देही र कपिलवस्तु जिल्लाको सीमा क्षेत्रमा सशस्त्र प्रहरी बलका विभिन्न युनिटहरूको निरीक्षण भ्रमण गर्नुभएको छ। उहाँले सशस्त्र प्रहरी बल नेपाल नं. २६, २७ र २८ गणका साथै सीमा सुरक्षा गुल्म, बोर्डर आउट पोष्ट (विओपी) र फरवार्ड वेसहरूको वस्तुस्थितिबारे जानकारी लिनुभएको हो।
निरीक्षणका क्रममा अतिरिक्त महानिरीक्षक पोखरेलले सीमा क्षेत्रमा तैनाथ सशस्त्र प्रहरी कर्मचारीहरूलाई देश र नागरिकको सुरक्षामा सदैव तत्पर रहन निर्देशन दिनुभयो। उहाँले प्रभावकारी सीमा सुरक्षा, सीमा क्षेत्रमा हुने आपराधिक गतिविधि नियन्त्रण तथा चोरी तस्करी रोक्न पूर्ण व्यावसायिकताका साथ कार्यसम्पादन गर्न आग्रह गर्नुभयो। यसैगरी, सम्भावित प्राकृतिक विपद्को जोखिमलाई मध्यनजर गर्दै चुस्त विपद् व्यवस्थापन र उद्धार कार्यका लागि चौबिसै घण्टा प्रभावकारी रूपमा परिचालित हुन समेत उहाँले मातहतका कर्मचारीहरूलाई निर्देश गर्नुभएको सशस्त्र प्रहरी बलले जनाएको छ।
