बुटवल । रुपन्देहीको तिलोत्तमा नगरपालिकामा एक घरबाट सुनका गरगहना चोरी गरेको आरोपमा प्रहरीले तीन जना युवालाई पक्राउ गरेको छ । पक्राउ पर्नेमा बुटवल उप-महानगरपालिका-७ का २३ वर्षीय बिष्णु थापा, वडा नं. १३ का २५ वर्षीय युसुक गुरुङ र वडा नं. ६ का २२ वर्षीय बिशाल तामाङ रहेका छन् ।
जिल्ला प्रहरी कार्यालय रुपन्देहीका अनुसार, असार २५ गते राति तिलोत्तमा नगरपालिका वडा नं. ३ जानकीनगरस्थित ध्रुव भण्डारीको घरबाट सुनका गरगहना चोरी भएको थियो । घटनाको खबर पाएलगत्तै खटिएको प्रहरी टोलीले हुलियाको आधारमा खोजतलास सुरु गरेको थियो ।
रुपन्देहीका प्रहरी प्रमुख एसपी प्रदिप बहादुर क्षेत्रीले दिएको जानकारी अनुसार, खोजतलासको क्रममा प्रहरीले घटनामा संलग्न तीनै जनालाई पक्राउ गरेको हो । पक्राउ परेका युवाहरुको खानतलासी गर्दा कुच्चिएको अवस्थामा एउटा मंगलशुत्र समेत बरामद भएको छ । पक्राउ परेका तीनै जनालाई इलाका प्रहरी कार्यालय बुटवलले नियन्त्रणमा लिई चोरी सम्बन्धी कसुरमा थप अनुसन्धान अगाडि बढाएको एसपी क्षेत्रीले बताए ।
