भक्तपुर । गृहमन्त्री ओमप्रकाश अर्यालले आज यहाँको सानोठिमीस्थित बाल सुधार गृहको अवलोकन गर्नुभएको छ । स्थलगत अवलोकन पश्चात उहाँले यहाँको वस्तुस्थितिका बारेमा जानकारी लिनुभएको थियो । यही माघ ८ गते बाल सुधार गृहमा भएको तोडफोडबाट पुगेको क्षतिबारे र घटनाका बारेमा गृहमन्त्री अर्यालले विस्तृत जानकारी लिनुभएको थियो । भक्तपुरका प्रमुख जिल्ला अधिकारी उमेशकुमार ढकाल र जिल्ला प्रहरी परिसर भक्तपुरका प्रहरी उपरीक्षक सूर्यबहादुर खड्काले घटनाका बारेमा मन्त्री अर्याललाई विस्तृत जानकारी गराउनुभएको थियो ।
गृहमन्त्री अर्यालले जिल्ला सुरक्षा समितिका पदाधिकारीलाई आगामी दिनमा त्यस्ता घटना दोहोरिन नदिन आवश्यक कार्ययोजना बनाएर कार्यान्वयनमा ल्याउन निर्देशनसमेत दिनुभयो । बाल सुधार गृहमा भएको उक्त घटनापश्चात् त्यहाँ रहेका १८ वर्षमाथिका बाल बिज्याइँकर्ताहरुलाई नुवाकोटस्थित कारागारभित्र रहेको छुट्टै ब्लकमा स्थानान्तरण गरिएको प्रजिअ ढकालले जानकारी गराउनुभयो ।
माघ ८ गते राति सुधारगृहमा बालबिज्याइँकर्ताले आगजनी र तोडफोड गरेका थिए । सुरक्षाका लागि प्रहरी वृत्त थिमिबाट गएको प्रहरीले झडप नियन्त्रण गर्न खोज्दा सुधार गृहभित्रबाटै प्रहरीमाथि ढुङ्गामुढा भएको थियो । सुधार गृृहमा १८ वर्षभन्दा माथिका ८४ जना र २४ जना बालिकासमेत थिए । बालिका र १८ वर्षमुनिका बालबिज्याइँकर्तालाई भने अहिले सुधार गृहमै राखिएको छ ।
