भैरहवा । रुपन्देही प्रहरीले आफ्नै श्रीमतीको हत्या गरी फरार रहेका बाग्लुङका विजय भनिने बिर बहादुर कुँवरलाई बुटवल बसपार्कबाट पक्राउ गरेको छ । कार्तिक २७ गते सिद्धार्थनगर–८ स्थित होटल लुम्बिनी गेटको स्टाफ कोठामा उनकी २० वर्षीया श्रीमती मेलिना परियार मृत फेला परेकी थिइन् ।
प्रहरीको प्रारम्भिक अनुसन्धान अनुसार, सामाजिक सञ्जालको प्रयोग र अर्को महिलासँगको कुराकानीलाई लिएर दम्पतीबीच विवाद भएको थियो। सोही क्रममा मदिरा सेवन गरेका कुँवरले श्रीमतीको हत्या गरेको खुलेको प्रहरी नायव उपरीक्षक सुरज कार्कीले जानकारी दिनुभयो ।
घटनापछि फरार भएका कुँवरलाई कार्तिक २८ गते साँझ बुटवल उपमहानगरपालिका–९ बसपार्क क्षेत्रबाट पक्राउ गरिएको हो। उनलाई आवश्यक कानूनी प्रक्रिया र थप अनुसन्धानका लागि म्याद थप गरिएको जिल्ला प्रहरी कार्यालय रुपन्देहीले जनाएको छ।
