राष्ट्रहितको संकल्पसहित हिन्दू स्वयम सेवक संघद्वारा धकधईमा गुरुपूर्णिमा उत्सव सम्पन्न

धकधई । गुरुको महत्वलाई उजागर गर्दै आदर्श नागरिक उत्पादन र राष्ट्रहितको कार्य गर्ने उद्देश्यका साथ हिन्दू स्वयम सेवक संघ नेपाल, धकधई खण्डले गुरुपूर्णिमा उत्सव एक कार्यक्रमका बीच सम्पन्न गरेको छ। कार्यक्रमका प्रमुख अतिथि लुम्बिनी संभागका प्रचारक पंकज शर्माले गुरु-शिष्य परम्पराले व्यक्ति, समाज र राष्ट्रलाई सही मार्ग देखाउने बताउनुभयो। उहाँले गुरुबाट प्राप्त ज्ञान र संस्कारलाई आत्मसात् गरी राष्ट्र सेवामा समर्पित हुन स्वयंसेवकहरूलाई आह्वान गर्नुभयो।

त्यसैगरी, कार्यक्रममा लुम्बिनी संभाग सम्पर्क प्रमुख संजय कुमार कौशलले संघले राष्ट्रियता, संस्कृति र अनुशासनको माध्यमबाट आदर्श नागरिक तयार पार्न महत्वपूर्ण भूमिका खेलेको बताउनुभयो। उत्सवमा संघका विभिन्न तहका पदाधिकारी तथा स्वयंसेवक बन्धुहरूको उत्साहजनक उपस्थिति रहेको थियो। कार्यक्रमले गुरुको सम्मान र राष्ट्रप्रतिको कर्तव्यबोधलाई पुनः जागृत गराएको सहभागीहरूले बताएका छन्।