रौतहट । मधेश प्रदेशका मुख्यमन्त्री सतिश कुमार सिंहले मंगलबार रौतहटको गौरस्थित प्रादेशिक अस्पतालमा मातृ शिशु स्वास्थ्य (एमसिएच) क्लिनिक र चमेना गृहको उद्घाटन गर्नुभएको छ । उद्घाटन कार्यक्रममा बोल्दै मुख्यमन्त्री सिंहले सरकारी अस्पतालहरूले आम नागरिकको विश्वास जित्नुपर्नेमा जोड दिनुभयो ।
उहाँले स्वास्थ्यकर्मीहरूलाई न्यूनतम शुल्कमा गुणस्तरीय स्वास्थ्य सेवा प्रदान गर्न निर्देशन दिनुभयो र गौर अस्पतालमा नर्सिङ कार्यक्रम सुरु गर्न पहल गर्ने प्रतिबद्धता व्यक्त गर्नुभयो ।
मुख्यमन्त्री सिंहले आफूले गैरकानुनी रूपमा सञ्चालित निजी अस्पतालहरूलाई अनुगमन गरी बन्द गराएको र मापदण्डविपरीत सञ्चालनमा रहेका अस्पतालहरूको अनुगमनलाई निरन्तरता दिने बताउनुभयो ।कार्यक्रममा स्वास्थ्य तथा जनसंख्यामन्त्री शत्रुधन प्रसाद सिंहले संघीयतापछि प्रदेशका अस्पतालहरूको अवस्थामा सुधार आएको र मधेशलाई स्वस्थ बनाउने दिशामा प्रदेश सरकार लागेको बताउनुभयो । स्वास्थ्य सचिव डा. प्रमोद यादवले पनि संघीयतापछि प्रादेशिक अस्पतालहरू सुधारको नमुना बनेको उल्लेख गर्नुभयो ।
