परासी । भारतबाट अवैध रूपमा सामान भित्र्याउन लागेका तस्करलाई नियन्त्रणमा लिन खोज्दा प्रहरी टोलीमाथि नै आक्रमण र अभद्र व्यवहार गर्ने एक व्यक्तिलाई नवलपरासी प्रहरीले पक्राउ गरेको छ। लुम्बिनी प्रदेश प्रहरी कार्यालय तुलसीपुर, दाङबाट खटिएको विशेष प्रहरी टोलीमाथि हातपात र अभद्र व्यवहार गरेको आरोपमा पाल्हीनन्दन गाउँपालिकाका ३३ वर्षीय इमरान अली मनसुरी पक्राउ परेका हुन्।
लुम्बिनी प्रदेश प्रहरी कार्यालय दाङले आफ्नो आधिकारिक फेसबुक पेजमार्फत सार्वजनिक गरेको विवरण अनुसार, मनसुरीले भारतबाट अवैध रूपमा बोइलर कुखुरा नेपालतर्फ ल्याउँदै गरेको अवस्थामा विशेष प्रहरी टोलीले उनलाई नियन्त्रणमा लिन खोजेको थियो। सोही क्रममा उनले प्रहरी टोलीमाथि गालीगलौज, हातपात गरेपछि प्रहरीले उनलाई नियन्त्रणमा लिएको हो।
पक्राउ परेका मनसुरीलाई जिल्ला प्रहरी कार्यालय नवलपरासी (बर्दघाट सुस्ता पश्चिम) मा राखिएको छ। उनलाई अभद्र व्यवहार सम्बन्धी मुद्दामा म्याद थप गरी आवश्यक कानुनी कारवाहीको प्रक्रिया अगाडि बढाइएको प्रहरीले जनाएको छ। सीमा क्षेत्रमा हुने अवैध चोरीपैठारी नियन्त्रणका लागि प्रहरीले निगरानी बढाएसँगै यस्ता घटनाहरू बाहिर आउन थालेका छन्।
