अर्घाखाँची । अर्घाखाँचीको सन्धिखर्क नगरपालिका वडा नं ७, भालुखोलामा ७ लाखको लागतमा नवनिर्मित गाउँघर क्लिनिकको उद्घाटन गरिएको छ। वडा नं ७ का अध्यक्ष चुरा ब केसीले क्लिनिकको उद्घाटन गर्दै स्वास्थ्य सेवामा सबै नागरिकको पहुँच सुनिश्चित गर्ने यसको मुख्य उद्देश्य रहेको बताउनुभयो। यो क्लिनिकले १५० घरधुरीलाई स्वास्थ्य सेवा प्रदान गर्नेछ।
अध्यक्ष केसीले स्वास्थ्य सेवा हरेक नागरिकको अधिकार भएको र गुणस्तरीय सेवाबाट कोही पनि वञ्चित हुनु नपरोस् भन्नेमा जोड दिनुभयो। उद्घाटन कार्यक्रममा खाँचीकोट गाविसका पूर्व अध्यक्ष सिद्धि प्रसाद ज्ञवाली, जनजीवन प्राथमिक विद्यालयका व्यवस्थापन समिति अध्यक्ष खिमानन्द आचार्य लगायतले मन्तव्य राख्नुभएको थियो । कार्यक्रम पूर्व गाविस अध्यक्ष सिद्धि प्रसाद ज्ञवालीको अध्यक्षता र खाँचीकोट स्वास्थ्य चौकी प्रमुख प्रेमचन्द्र विकको सञ्चालनमा सम्पन्न भएको थियो।
