काठमाडौँ । त्रिभुवन अन्तर्राष्ट्रिय विमानस्थल बुधबार मध्यान्ह १२ बजेसम्म बन्द रहने भएको छ। जेनजी प्रदर्शनका कारण मंगलबार दिउँसोदेखि विमानस्थल बन्द गरिएको थियो। बुद्ध एयरले एक सूचना जारी गर्दै यात्रुहरूलाई पर्न गएको असुविधाप्रति माफी मागेको छ ।
देशको विषम परिस्थितिका कारण आन्तरिक उडानहरू प्रभावित भएका छन्। टिकट लिइसकेका यात्रुहरूको पैसा फिर्ता गरिने कम्पनीले जनाएको छ । वायुसेवा सञ्चालक संघले विषम परिस्थितिमा पनि आम जनतालाई सेवा दिने प्रतिबद्धता जनाएको छ । संघका अध्यक्ष मनोज कार्कीले एक विज्ञप्ति जारी गर्दै संघका सदस्य कम्पनीहरू सदैव आम जनसमुदायको सेवामा तत्पर रहने बताएका छन्।
संघले भदौ २३ गते जेनजी प्रदर्शनका क्रममा भएको दुःखद घटना र हिंसाप्रति गहिरो चिन्ता व्यक्त गर्दै दिवङ्गत भएकाहरूप्रति श्रद्धाञ्जली अर्पण गरेको छ। घाइतेहरूको शीघ्र स्वास्थ्य लाभको कामना पनि गरिएको छ । यसैबीच, संघले अर्को एक विज्ञप्ति निकालेर उडान सञ्चालनमा रहेका हेलिकप्टरहरूबाट कुनै पनि राजनीतिज्ञ वा मन्त्रीलाई उडान सेवा नदिएको दाबी गरेको छ।
