मर्चवार ।लैङ्गिक हिंसा विरुद्धको १६ दिने अभियान अन्तर्गत रुपन्देहीको मर्चवार स्थित कोटहीमाई गाउँपालिकामा विद्यार्थीहरूलाई लक्षित गरी सचेतनामुलक कार्यक्रम सम्पन्न भएको छ । कोटहीमाई गाउँपालिकाको सहकार्यमा कोटहीमाई-२ स्थित श्रीराम माध्यमिक विद्यालयमा उक्त कार्यक्रम सञ्चालन गरिएको हो । विद्यालयको कक्षा ९ र १० मा अध्ययनरत किशोर-किशोरीहरूलाई लक्षित गरी आयोजित कार्यक्रममा प्रहरी सहायक निरीक्षक (असई) सुरज पन्थले प्रशिक्षण दिएका थिए ।
कार्यक्रममा बोल्दै असई पन्थले समाजमा हुने विभिन्न प्रकारका लैंगिक हिंसा, यसका कारण, असर र कानुनी उपचारका विषयमा विद्यार्थीहरूलाई जानकारी गराएका थिए । उनले हिंसा सहेर बस्न नहुने र कतै हिंसा भएको देखेमा सम्बन्धित निकाय वा प्रहरीलाई खबर गर्न विद्यार्थीहरूलाई आग्रह गरे । विद्यार्थीहरू मार्फत घर-परिवार र समाजमा चेतना फैलाउने उद्देश्यले १६ दिने अभियानको सन्दर्भ पारेर यो कार्यक्रम आयोजना गरिएको हो । कार्यक्रममा विद्यार्थीहरूको उल्लेख्य सहभागिता रहेको थियो ।
