भैरहवा । रुपन्देही प्रहरीले भन्सार छली र चोरी पैठारी गरी ल्याइएका ६ लाख रुपैयाँ भन्दा बढीको अवैध सामान बरामद गरेको छ। मंसिर १६ र १७ गते जिल्लाका विभिन्न स्थानमा गरिएको चेकजाँचका क्रममा अन्दाजी ६ लाख ६ हजार रुपैयाँ बराबरको सामान नियन्त्रणमा लिइएको हो ।
प्रहरी नायव उपरीक्षक (डीएसपी) सुरज कार्कीका अनुसार, रोहिणी गाउँपालिका–३ बाट भैंसी, पाडी तथा लत्ताकपडा गरी ४ लाख ५१ हजार रुपैयाँ बराबरको सामान र सिद्धार्थनगर–१ बेलहियाबाट मोटरसाइकल, कस्मेटिक तथा दैनिक उपभोग्य वस्तु गरी १ लाख ५५ हजार बराबरको सामान बेवारिसे अवस्थामा फेला परेको थियो । बरामद गरिएका सम्पूर्ण सामानहरू आवश्यक कारबाहीका लागि भैरहवा भन्सार कार्यालय बेलहिया पठाइएको प्रहरीले जनाएको छ।
