काठमाडौं । काठमाडौंमा प्रहरीले गत भदौ २४ गतेको जेनजी युवाहरूको प्रदर्शनका क्रममा दरबारमार्ग प्रहरी वृत्तबाट लुटिएको पेस्तोलको गोली लुकाइछिपाई राखेको अभियोगमा दुई जनालाई पक्राउ गरेको छ। पक्राउ पर्नेमा बर्दियाका १७ वर्षीय अनिश गिरी र झापाका १६ वर्षीय सोनम थापामगर छन् ।
काठमाडौं उपत्यका प्रहरी कार्यालयका प्रमुख दानबहादुर कार्कीका अनुसार, नरेफाँटमा चेकजाँचका क्रममा शंकास्पद देखिएका गिरीलाई नियन्त्रणमा लिई सोधपुछ गर्दा उनको र थापामगरको कोठामा पेस्तोलका गोलीहरू भेटिएका हुन्।
अनुसन्धानका क्रममा गिरीको लाजिम्पाटस्थित कोठाबाट '३११२३' नम्बर लेखिएका पेस्तोलका तीन थान गोली र थापामगरको मालिगाउँस्थित कोठाबाट सोही नम्बरका दुई थान गोली तथा एउटा छालाको पेटीको बक्कल बरामद गरिएको प्रहरीले जनाएको छ। दुवैलाई थप अनुसन्धानका लागि दरबारमार्ग प्रहरी वृत्त पठाइएको छ।
