भैरहवा । रुपन्देहीमा हिजो देखि हराईरहेको दुध बोक्ने गाडी घाघरा खोलामा भेट्टिएको छ । मर्चवारबाट दुध बोकेर भैरहवा तर्फ आईरहेको भे १ च २६७६ नम्बरको जिप शनिबार विहान देखि हराईं रहेको थियो । रुपन्देही प्रहरी प्रमुख प्रहरी उपरिक्षक रञ्जित सिंह राठौरले जिप फेला परेको बताए ।
फेला परेको जिपलाई क्रेन मगाई निकाल्ने प्रयास भईरहेको उनले बताए । जिपका चालक प्रकाश तमाङ्ग र सह–चालक उमेश लोध भने अझै वेपत्ता रहेको राठौरले जानकारी दिए । हराईरहेका चालक र सह–चालकको खोजी कार्य जारी रहेको उनको भनाई छ ।
सम्मरीमाई गाउँपालिका–५ स्थित रोइनिहवाबाट तिवारी दूध संकलन केन्द्रबाट सो गाडी संकलन केन्द्रबाट दूध लिएर शनिबार बिहान ५ बजे भैरहवा आउदै थियो । सोही क्रममा गौतमबुद्ध अन्र्तराष्ट्रिय विमानस्थल पछाडी रहेको घाघरा खोलाबाट जिप हराएको थियो । शनिबार देखि नै नेपाल प्रहरी, शसस्त्र प्रहरी र नेपाली सेनाको टोलीले खोजी कार्य गरे पनि आज मात्र जिप भेटिएको हो ।
