गुल्मी । निर्माण व्यवसायी संघ, गुल्मीले वास्तविक लागतभन्दा अत्यधिक न्यून दरमा बोलपत्र (टेन्डर) पेश नगर्न जिल्लाभित्र तथा बाहिरका सम्पूर्ण निर्माण व्यवसायीहरूलाई सार्वजनिक आग्रह गरेको छ। साउन १९ गते बसेको संघको बैठकको निर्णय सार्वजनिक गर्दै पुरानै शैलीमा अत्यन्तै कम दरमा टेन्डर हाल्ने प्रवृत्तिले निर्माण व्यवसाय नै संकटमा पर्ने चेतावनी दिइएको छ।
संघका अध्यक्ष हरिकुमार श्रेष्ठले पेट्रोलियम पदार्थ, निर्माण सामग्री, ढुवानी, उपकरण सञ्चालन, बैंकिङ लागत तथा श्रमिक ज्यालामा निरन्तर वृद्धि भइरहेकाले अस्वस्थ प्रतिस्पर्धा नगर्न आग्रह गर्नुभयो। वास्तविक लागतभन्दा निकै कम दरमा बोलपत्र पेश गर्दा निर्माण व्यवसायी आर्थिक रूपमा घाटामा पर्ने, आयोजना ढिलाइ हुने र निर्माणको गुणस्तरमा समेत असर पर्ने जोखिम रहने उहाँको भनाइ छ।
संघले क्षणिक प्रतिस्पर्धाभन्दा दीर्घकालीन व्यावसायिक स्थायित्व, गुणस्तरीय निर्माण, समयमै आयोजना सम्पन्न गर्ने प्रतिबद्धता र व्यावसायिक मर्यादालाई प्राथमिकता दिन जोड दिएको छ। अध्यक्ष श्रेष्ठद्वारा हस्ताक्षरित अपिलमा "अस्वस्थ प्रतिस्पर्धा नगरौँ, व्यवसाय जोगाऔँ, गुणस्तरीय निर्माण गरौँ" भन्ने सन्देश समेत प्रवाह गरिएको छ।
