भैरहवा । नेपाली काँग्रेसका उपसभापति विश्वप्रकाश शर्माले आगामी फागुन २१ गते हुने प्रतिनिधि सभा सदस्य निर्वाचनबाट काँग्रेस सबैभन्दा ठूलो र पहिलो दलको रूपमा उदाउने दाबी गर्नुभएको छ । रुपन्देहीको भैरहवामा आयोजित चुनावी भेटघाट कार्यक्रमलाई सम्बोधन गर्दै शर्माले देशका विभिन्न स्थानबाट प्राप्त सूचनाले काँग्रेस बहुमतको नजिक रहेको र पुनः देशको नेतृत्व गर्ने दिशातर्फ अग्रसर भएको बताउनुभयो ।
उपसभापति शर्माले यो निर्वाचन केवल जित र हारको विषय मात्र नभई देशमा भएका पछिल्ला हिंसात्मक घटना, ‘जेनजी विद्रोह’, संसद् भवन तथा सिंहदरबारमा भएको आगजनी र जनमानसमा छाएको निराशाको गम्भीर समीक्षा गर्ने अवसर भएको उल्लेख गर्नुभयो । उहाँले नयाँपन उमेरले नभई सोच र दृष्टिकोणले हुने भन्दै काँग्रेस अब नयाँ र परिष्कृत सोचसहित बदलिएर जनतामाझ आएको जिकिर गर्नुभयो ।
सोही कार्यक्रममा पूर्व गृहमन्त्री बालकृष्ण खाणले गौतमबुद्ध अन्तर्राष्ट्रिय विमानस्थलको पूर्ण सञ्चालन र विकासका लागि काँग्रेस नेतृत्वको सरकार अपरिहार्य रहेको बताउनुभयो । साथै, उम्मेदवार भरत कुमार शाह, लुम्बिनी प्रदेश परिचालन समिति संयोजक राजु खनाल लगायतका नेताहरूले भ्रष्टाचारमुक्त समाज निर्माण, संविधानको रक्षा र जेनजी पुस्ताले उठाएका जायज मागहरूको सम्बोधन गर्न काँग्रेसलाई जिताउन आग्रह गर्नुभयो ।
