भैरहवा । रुपन्देही जिल्ला नेपालका राष्ट्रिय एवं अन्तराष्ट्रिय क्रिकेट खेलाडीहरुको उद्गम स्थल भएको नेपाल क्रिकेट एसोसिएसन कयानका केन्द्रिय सचिव सचिव पारस खड्काले बताएका छन् । मंसिर १२ गते फिल्ड भिजटको लागि सिदार्थ रंगशालाको आएका खड्काले रुपन्देही क्रिकेट एसोसियसनको टिम सँगको अन्तरक्रिया कार्यक्रममा उक्त कुरा बताएका हुन् ।
उनले भने,“नेपालको क्रिकेट खेलमा उत्कृष्ट र जुझारु खेलाडी उत्पादन गर्न रुपन्देही क्रिकेट एसोसियसनको समेत महत्वपूर्ण भूमिका रहेको छ”। जिल्ला गत रुपमा खेलकुदको विकासको लागि विनियोजन गरीने बजेट अब जिल्लाका सम्बन्धित संस्थाहरुको सक्रियतामा गर्नु पर्ने खड्काको तर्क रहेको छ ।
रुपन्देही क्रिकेट एसोसियसनका अध्यक्ष हरी बहादुर थापाले केन्द्रिय संस्थाहरुको सहकार्यले यहाँ स्थानीय युवाहरु खेलकुदमा थप दक्ष र प्रतिभाशाली हुन सक्ने बताए । उनले युवाहरुलाइ ढुक्क सँग खेलाडीको रुपमा आफ्नो पहिचान बनाउन सक्ने वातावरण सृजना गर्नु पर्ने आजको आवश्यक्ता भएको बताए ।
त्यस्तै रुपन्देही क्रिकेट एसोसयसनका सचिव सन्जय गुरुङका अनुसार खेलाडीले देशलाई अन्तराष्ट्रिय रुपमा समेत चिनाउने भएको र पछिल्लो समय क्रिकेट एसोसिएसनले युवाहरुलाई खेलकुदमा रुची र सहजता प्रदान गर्न लागी परिरहेको बताए ।
कार्यक्रममा रुपन्देही क्रिकेट एसोसियसनका सल्लाहकार, पदाधीकारी, पूर्व राष्ट्रिय महिला खेलाडीहरु, र यस क्षेत्रका क्रिकेट खेलाडीहरुको सहभागीता रहेको थियो ।
