रोहिणी । रोहिणी गाउँपालिका वडा नं. ४, खुरहुरीया निवासी शेषमणि यादवले आफ्नो जन्मदिनको अवसरमा स्थानीय विद्यार्थीहरूलाई शैक्षिक सामग्री सहयोग गरेर उदाहरणीय कार्य गर्नुभएको छ। श्री छिपागढ माध्यमिक विद्यालयका भूतपूर्व विद्यार्थी समेत रहनुभएका यादवले आफ्नो जन्मदिनको शुभ अवसर पारेर विद्यालयका साना बालबालिकाहरूलाई सहयोग हस्त बढाउनुभएको हो।
उहाँले विद्यालयको नर्सरी, केजी र कक्षा १ मा अध्ययनरत ५० जना विपन्न तथा जेहेन्दार विद्यार्थीहरूलाई कापी, पेन्सिल, कटर र इरेजर लगायतका अत्यावश्यक शैक्षिक सामग्रीहरू वितरण गर्नुभएको छ। जन्मदिनमा फजुल खर्च गर्नुको साटो बालबालिकाको शिक्षामा टेवा पुर्याउने उद्देश्यले गरिएको यस कार्यको स्थानीयस्तरमा निकै प्रशंसा भइरहेको छ।
आफ्ना भूतपूर्व विद्यार्थीबाट विद्यालय र विद्यार्थीप्रति दर्शाएको यो सद्भावप्रति छिपागढ माध्यमिक विद्यालय परिवारले खुसी व्यक्त गरेको छ। विद्यालयले एक सन्देश जारी गर्दै दाता शेषमणि यादवलाई हार्दिक धन्यवाद ज्ञापन गर्नुका साथै उहाँको सु–स्वास्थ्य, दीर्घायु एवं उत्तरोत्तर प्रगतिको कामना सहित सुखद बैशालु शुभकामना व्यक्त गरेको छ।
