बुटवल । बुटवल स्थित प्रहरी तालिम केन्द्रमा “प्रहरी जवान आधारभूत तालिम ८-११४ औं समूह” को आज औपचारिक रुपमा उद्घाटन गरिएको छ । केन्द्रका समादेशक एवं प्रहरी वरिष्ठ उपरीक्षक (एसएसपी) सन्तोष सिंह राठौरले एक समारोहका बीच तालिमको समुद्घाटन गर्नुभएको हो ।
कार्यक्रममा बोल्दै प्रमुख अतिथि एसएसपी राठौरले प्रशिक्षार्थीहरूलाई प्रहरी जीवनमा अनुशासनको उच्च महत्व रहने बताउनुभयो । उहाँले तालिमलाई हैरानीको रूपमा नलिई केही सिक्ने सुनौलो अवसरका रूपमा ग्रहण गर्न आग्रह गर्नुभयो । साथै, तालिम केन्द्रको स्थायी आदेश र संगठनको नीति निर्देशन पूर्ण रूपमा पालना गरी सफलतासाथ तालिम सम्पन्न गर्न उहाँले शुभकामना दिनुभयो ।
कार्यक्रममा तालिमका सह-संयोजक प्रहरी निरीक्षक विजय थापाले तालिमसम्बन्धी संक्षिप्त प्रतिवेदन प्रस्तुत गर्नुभएको थियो । सो अवसरमा यसअघि नै तालिमरत ८-११३ औं समूहका प्रशिक्षार्थीहरूले नवप्रवेशीहरूका लागि विभिन्न विधामा ‘कवाज प्रदर्शनी’ गरेका थिए । उद्घाटन समारोहमा तालिम केन्द्रका प्रहरी निरीक्षकहरू, जुनियर प्रहरी अधिकृतहरू तथा प्रशिक्षक वर्गको उपस्थिति रहेको थियो ।
