भैरहवा । नेपाल प्रहरीका महानिरीक्षक दान बहादुर कार्कीले खुला सिमानाको फाइदा उठाएर हुने तस्करी र अवैध गतिविधि नियन्त्रणमा प्रहरी प्रशासन कठोर रूपमा प्रस्तुत हुने बताउनुभएको छ। लुम्बिनी प्रेस क्लबको ११ औं स्थापना दिवस तथा तेस्रो लुम्बिनी न्युज फेस्टिवलको समापन समारोहलाई सम्बोधन गर्दै उहाँले सीमा क्षेत्र तस्करहरूको लागि 'स्वर्णभूमि' बन्न नहुनेमा जोड दिनुभयो। तस्करी दुवै पक्षका लागि हानिकारक हुने भन्दै उहाँले यसको प्रभावकारी नियन्त्रणका लागि सही सूचनाको आदानप्रदान र सन्तुलित समाधानमा प्रहरी सक्रिय रहेको उल्लेख गर्नुभयो।
सम्बोधनकै क्रममा महानिरीक्षक कार्कीले विदेशी तथा स्वदेशी सवारी साधनहरूको जाँच प्रक्रियालाई व्यवस्थित बनाउने प्रहरीको नयाँ धारणा पनि सार्वजनिक गर्नुभयो। नेपालको अर्थतन्त्र आयातमा आधारित रहेकाले सीमा नाकामा एकपटक विस्तृत जाँच भइसकेका मालवाहक तथा यात्रुवाहक सवारी साधनलाई बीच बाटोमा पटक-पटक रोकेर अनावश्यक दुःख दिन नहुने उहाँले स्पष्ट पार्नुभयो। यद्यपि, ट्राफिक नियम उल्लंघन, दुर्घटना वा कुनै आपराधिक गतिविधिको शंका लागेको अवस्थामा भने जुनसुकै स्थानमा जाँच र कारबाही गरिने उहाँको भनाइ छ। उहाँले प्रहरीको उद्देश्य नागरिक र व्यवसायीलाई सास्ती दिनु नभई सहज वातावरण सिर्जना गर्दै सुरक्षा व्यवस्थालाई मजबुत बनाउनु रहेको बताउनुभयो।
