परासी । नवलपरासीको बर्दघाटस्थित एक डान्सबारमा भएको दुई पक्षबिच कुटपिटमा एक जनाको मृत्यु भएको छ । युवाहरू बिच आपसमा विवाद हुँदा उक्त घटना भएको प्रहरीले जनाएको छ । बर्दघाट नगरपालिका–१३, जमुनाबारीमा रहेको नशा रेष्टुरेन्ट एण्ड डान्स बारमा दुई पक्षबिच कुटाकुट भएको प्रहरीले जनाएको हो ।
प्रहरीका अनुसार कुटपिटमा घाइते भएका प्रतापपुर गाउँपालिका–९, खैरेनीका ४५ वर्षीय सन्तबहादुर चौधरीको उपचारको क्रममा बुटवलमा मृत्यु भएको हो । घटनामा संलग्न भएको आरोपमा प्रहरीले डान्स बारका सञ्चालक राकेश हरिजन सहित प्रतापपुर–१ बस्ने अमित चौधरी र सरोज चौधरीलाई नियन्त्रणमा लिएको छ । डान्सबारभित्र भिडियो खिचेको निहुँमा झगडा भएको बताइएको छ ।
घटनामा मिन्टु र सरोज कुमार चौधरी पनि घाइते भएका थिए । पक्राउ परेका प्रतिवादीविरुद्ध नवलपरासी जिल्ला अदालतमा ज्यान मार्ने उद्योगमा मुद्दा दायर भइ थप अनुसन्धान भइरहेको जिल्ला प्रहरी कार्यालय नवलपरासीले जानकारी गराएको छ ।
