मर्चवार । एमबीबीएस अध्ययनका लागि पूर्ण छात्रवृत्तिमा नाम निकाल्न सफल रुपन्देहीको मर्चवारीमाई गाउँपालिका–६, बगौली निवासी श्याम गुप्तालाई पूर्व प्रतिनिधि सभा सदस्य प्रमोद कुमार यादवले ५० हजार रुपैयाँ आर्थिक सहयोग गर्नुभएको छ । आर्थिक अभावका कारण जेहेन्दार विद्यार्थीको शिक्षामा कुनै बाधा नआओस् भन्ने उद्देश्यले यादवले गुप्ताको घरमै पुगेर उक्त सहयोग तथा हौसला प्रदान गर्नुभएको हो ।
गत २०८२ सालको कार्तिकमा सम्पन्न प्रवेश परीक्षामा सहभागी गुप्ताले ५७औँ र्याङ्कसहित १६४ अंक प्राप्त गरी पूर्ण छात्रवृत्तिमा नाम निकाल्न सफल भएका छन् । उत्कृष्ट अंकसहित काठमाडौंका प्रतिष्ठित मेडिकल कलेजमा अध्ययन गर्ने अवसर हुँदाहुँदै पनि बसोबास र खर्चको भारका कारण उनले घर नजिकै पर्ने भैरहवास्थित युनिभर्सल कलेज अफ मेडिकल साइन्सेजमा भर्ना हुने निर्णय गरेका छन् । आर्थिक अवस्था कमजोर भए पनि गुप्ताको लगनशीलता र मेहेनतको कदर गर्दै पूर्व सांसद यादवले उनको आगामी शैक्षिक यात्रा निरन्तर रहोस् भन्ने कामना समेत गर्नुभएको छ ।
