अर्घाखाँची । सरकारले सवारी साधनमा अनिवार्य रूपमा इम्बोस्ड नम्बर प्लेट जडान गर्न निर्देशन दिएपछि अर्घाखाँचीको सदरमुकाम सन्धिखर्कमा सोमबार बिहान त्यसको विरोधमा प्रदर्शन भएको छ । जिल्लाको सन्धिखर्क नगरपालिका-२, भक्तिटोला चोकमा स्वतन्त्र युवा नागरिकहरुको आयोजनामा विरोध कार्यक्रम सम्पन्न भएको हो ।
प्रदर्शनका क्रममा सहभागीहरुले "इम्बोस्ड नम्बर सिस्टम चाहिँदैन", "नागरिक लुट्न पाइँदैन", "इम्बोस्ड सिस्टम खारेज गर" र "नेपाली भाषा मेट्न पाइँदैन" जस्ता नारा लेखिएका प्लेकार्ड बोकेर नाराबाजी गरेका थिए । कार्यक्रमलाई सम्बोधन गर्दै समाजसेवी हेमराज भुसालले इम्बोस्ड नम्बर प्रणालीले नागरिकमा पार्ने असर र यसको विरोध गर्नुको कारणबारे प्रकाश पारेका थिए । स्वतन्त्र पत्रकार अर्घाखाँचीका अध्यक्ष गुरुदेव खनालको समन्वयमा भएको उक्त कार्यक्रममा यातायात व्यवसायी तथा अन्य क्षेत्रका अगुवाहरुको पनि बाक्लो उपस्थिति रहेको थियो ।
