अर्घाखाँची । जिल्ला प्रहरी कार्यालय, अर्घाखाँचीले भैंसीलाई अमानवीय तरिकाले यातना दिई ओसारपसार गरेको आरोपमा दुई जनालाई पक्राउ गरेको छ । पक्राउ पर्नेमा भूमिकास्थान नगरपालिका–६ का २३ वर्षीय सरोज पौडेल र रोल्पाको लुङ्ग्री गाउँपालिका–२ का १८ वर्षीय क्रिस बानिया रहेका छन् ।
प्रहरीका अनुसार, सन्धिखर्क नगरपालिका–२ स्थित घोचेखोला भन्ने स्थानमा धारापानीबाट सन्धिखर्कतर्फ आउँदै गरेको लु १ च ३८२६ नम्बरको बोलेरो गाडीलाई रोकेर जाँच गर्दा घटना बाहिर आएको हो । गाडीको पछाडिको ढालामा चारवटा भैंसीलाई अत्यन्तै साँघुरो ठाउँमा कोचेर बाँधिएको र शारीरिक यातना दिएको अवस्थामा फेला पारिएको थियो । प्रहरी नायव उपरीक्षक चक्र बहादुर मल्लले जानकारी दिनुभए अनुसार, भैंसीहरूलाई बुटवलतर्फ लैजाने तयारी थियो ।
साँघुरो ठाउँमा कोचिएका कारण भैंसीहरू गाडीमा ठोक्किएर घाइते भएका थिए । प्रहरीले तत्कालै गाडी, भैंसी र दुवै व्यक्तिलाई नियन्त्रणमा लिएको थियो । जिल्ला प्रहरी कार्यालयका सूचना अधिकारी झलक प्रसाद शर्माका अनुसार, पक्राउ परेका दुवै जनालाई मुलुकी अपराध संहिता, २०७४ को पशुपक्षी सम्बन्धी कसूर अन्तर्गत मुद्दा चलाइएको छ । उनीहरूलाई म्याद थप गरी थप अनुसन्धान अगाडि बढाइएको प्रहरीले जनाएको छ ।
