मर्चवार । रुपन्देहीको सम्मरीमाई गाउँपालिका वडा २ मा दुर्घटना हुँदा एक महिलाको मृत्यु भएको छ । बनगाईमा निर्माण भइरहेको कलभर्टमा खसेर युपी ५५ क्यू ८४३२ नम्बरको भारतीय मोटरसाइलकमा सवार ४ जना मध्ये १ मृत्यु ३ घाइते भएका इलाका प्रहरी कार्यालय मर्चवारले जनाएको छ ।
मोटरसाइकलमा सवार सम्मरीमाई १ की ज्ञानमती चमारको भीम अस्पताल भैरहवामा उपचारको क्रममा मृत्यु भएको इलाका प्रहरी कार्यालय मर्चवारका प्रहरी निरीक्षक घनदेव साउदले जानकारी दिएका छन् । यसैगरी उक्त घटनामा परी घाइते भएका सम्मरीमाई १ कै इन्द्रजीत चमार, युराज चमार, मनीसा हरिजनको युनिभर्षल क्लेज अफ मेडिकल साइन्सेजमा उपचार भइरहेको प्रहरी निरीक्षक साउदले जानकारी दिएका छन् ।
हिजो बिहिबार साँझ करीब ७ः३० बजे भएको उक्त दुर्घटनाको मुख्य कारण अहिले खुल्न नसकेको बताउदै घटनाबारे थप अनुसन्धान भाइरहेको प्रहरी निरीक्षक साउदले जानकारी दिएका छन् ।
निर्माण स्थलमा रातीमा प्रस्ट देखिने बाटो अवरोधक तथा जानकारी बोर्ड नहुँदा उक्त घटना भएको स्थानीयहरुले बताए । निर्माण कम्पनीले रातीमा टाढैबाट देखिने टल्किने रेडिएम स्टीकर वा बोर्ड नरखेकोले मोटरसाइकल चालक बाटोबारे प्रस्ट हुन नसकेको स्थानीयले बताए ।
सम्मरीमाई गाउँपालिका अध्यक्ष बिनोद कुमार श्रीवास्तवले उक्त ठाउँमा घटना नहुनपर्ने बताए । उनले भने ‘२ सातादेखि निर्माणाधीन रहेको उक्त ठाउँबारे यस क्षेत्रका अधिकांसलाई जानकारी थियो । घटनाको सत्यतथ्य छानबिन हुनुपर्छ ।’
विगत १५ दिन देखि निर्माण कार्य भइरहेको उक्त निर्माण स्थलमा सुचना बोर्ड र बाटो परिवर्तको जानकारी अगावै राखेको कलभर्ट निर्माण कम्पनी सबिना निर्माण सेवाका संचालक अहमद अली साहले बताए । उनले भने ‘उक्त निर्माण कार्यबारे सबै स्थानीयहरुलाई पहिलैदेखि अवगत रहेको छ । निर्माण स्थल भन्दा पहिलै बाटो बन्द र परिवर्तन भएको जानकारी सहितको बोर्ड पनि राखका थियौँ तर उक्त जानकारीलाई नजाने झै गर्दा उक्त घटना भएको हो ।’
