नेपालगञ्ज । बाँके जिल्लास्तरीय १५ औं राष्ट्रपति रनिङ शिल्ड खेलकुद प्रतियोगिता–२०८० को उपाधि कोहलपुर नगरपालिकाले जितेको छ ।
कोहलपुरले उपाधि लगातार तेस्रो वर्ष पनि जितेको हो । प्रतियोगितामा जिल्लाका ७ वटा स्थानीय तहबाट छनोट भएर आएका एक हजार खेलाडीबीच ६ वटा विधाका खेलमा प्रतिस्पर्धा गराइएको थियो ।
३६ स्वर्ण, ९ रजत र ५ कांस्य पदक जित्दै कोहलपुर रनिङ शिल्डको उपाधिमा ह्याट्रीक गर्न सफल भएको हो । दोस्रो भएको राप्तीसोनारी गाउँपालिकाले १३ स्वर्ण, १७ रजत र २० कांस्य पदक प्राप्त गरेको छ ।
तेस्रो स्थानमा नेपालगन्ज उपमहानगरपालिकाले ७ स्वर्ण, ६ रजत र ६ कांस्य पदक प्राप्त गरेको छ । यस्तै बैजनाथ गाउँपालिकाले ६ स्वर्ण, १४ रजत र १५ कांस्य पदक प्राप्त गरेको छ ।
प्रतियोगितामा ३ स्वर्ण, ५ रजत र ३ कांस्य पदकसहित पाँचौ स्थानमा खजुरा गाउँपालिका, नरैनापुरले एक स्वर्ण र जानकीले २ रजत पदकमा चित्त बुझाएका छन् ।
उत्कृष्ट खेलाडीमा एथलेटिक्स छात्रतर्फ राप्तीसोनारीका करण नेपाली, छात्रातर्फ नेपालगन्जका आरुषी भट्टराई, भलिबल छात्रतर्फ कोहलपुरका संगम तारामी मगर र छात्रातर्फ राप्तीसोनारीकी लक्ष्मी चौधरी भए ।
यस्तै कबड्डी छात्रातर्फ खजुराकी सुषमा बादी र छात्रतर्फ नेपालगन्जका इसरारर अलि साई, तेक्वान्दो छात्रातर्फ कोहलपुरकी दिपशिखा रानाभाट र छात्रतर्फ कोहलपुरकै सुवर्ण सिग्देल उत्कृष्ट हुन सफल भए ।
यस्तै करातेमा छात्रातर्फ बैजनाथकी वविता विक, छात्रतर्फ कोहलपुरका शुभम बूढा तथा उसु छात्रातर्फ कोहलपुरकी गरिमा चौधरी र छात्रतर्फ कोहलपुरकै टार्जन रोकामगर उत्कृष्ट खेलाडी घोषित भए ।
