ओमसतिया । ओमसतिया तेक्वान्दो क्लबको आयोजनामा 'प्रथम ओमसतिया अध्यक्ष कप जुनियर आमन्त्रण तेक्वान्दो प्रतियोगिता' भव्य रूपमा सम्पन्न भएको छ। न्यू ओमसतिया तेक्वान्दो डोजाङको संयोजनमा गत जेठ १५ र १६ गते सञ्चालित यस खेलकुद प्रतियोगितामा विभिन्न क्षेत्रका गरी जम्मा १११ जना खेलाडीहरूले उत्साहजनक सहभागिता जनाएका थिए।
क्लबका अध्यक्ष रामु हरिजनको सभापतित्वमा सम्पन्न भएको उक्त कार्यक्रममा ओमसतिया गाउँपालिकाका अध्यक्ष मन्जित कुमार यादव प्रमुख अतिथिको रूपमा रहनुभएको थियो। कार्यक्रमलाई थप गरिमामय बनाउन विशिष्ट अतिथिका रूपमा अग्लेश्वर पाण्डे र राकेश यादवको उपस्थिति रहेको थियो। खेल क्षेत्रलाई चलायमान बनाउने उद्देश्यका साथ आयोजित यस प्रतियोगिताको भव्य सञ्चालन धर्मराज हरिजनले गर्नुभएको थियो भने उहाँलाई सहायकका रूपमा टिकाराम तिवारीले साथ दिनुभएको थियो।
प्रतियोगितालाई निष्पक्ष र व्यवस्थित बनाउन अन्तर्राष्ट्रिय निर्णायक राजेश शाहनी र नेशनल निर्णायक रामप्रसाद काहारले मुख्य भूमिका निभाउनुभएको थियो। खेलको प्राविधिक तथा रेफ्री टोलीमा सन्ध्या यादव, सुरज कुमार हरिजन, धीरेन्द्रप्रसाद लोध, पवन पासी, अनुज केवाट, शिवचरण मल्ल र अनुप हरिजन रहनुभएको थियो। अत्यन्तै प्रतिस्पर्धात्मक र रोमाञ्चक खेलहरू प्रदर्शन गर्दै प्रतियोगितामा 'फर्स्ट ओम सतिया तेक्वान्दो डोजाङ' प्रथम स्थान हासिल गर्न सफल भयो। त्यसैगरी 'न्यू ओम सतिया तेक्वान्डो डोजाङ' द्वितीय र 'ओम स्टार तेक्वान्दो डोजाङ' ले तृतीय स्थान प्राप्त गर्दै प्रतियोगिताको समापन भएको छ।
