भैरहवा । लायन्स क्लब अफ सिद्धार्थनगर गौतमबुद्धले रुपन्देहीको भैरहवास्थित पाल्पाली पथमा वृक्षारोपण तथा स्वच्छ वातावरण कार्यक्रम सम्पन्न गरेको छ । सिद्धार्थनगर नगरपालिका र वडा नं. ६ को सहयोगमा आयोजित उक्त कार्यक्रममा २३ वटा आरसीसी ब्लक (गमला) मा विभिन्न प्रजातिका बिरुवा रोपिएको छ ।
कार्यक्रमका प्रमुख अतिथि सिद्धार्थनगर नगरपालिकाका प्रमुख इश्तियाक अहमद खाँले नगरलाई हराभरा र वातावरण स्वच्छ बनाउन यस्ता सामाजिक पहलले ठूलो योगदान पुर्याउने बताउनुभयो । क्लबका वर्ष २०२६/०२७ का अध्यक्ष सुरज भट्टराईले वातावरण संरक्षणका लागि वृक्षारोपण गरिएको जनाउँदै सहयोग पुर्याउने नगरपालिकालगायत सम्पूर्णप्रति आभार व्यक्त गर्नुभयो ।
कार्यक्रममा सिद्धार्थनगर–६ का वडाअध्यक्ष विरेन्द्रनाथ श्रीवास्तव, डिष्ट्रिक लिडर सुनिल सेन्चुरी, निर्मला श्रेष्ठ, क्लबका संस्थापक अध्यक्ष गौतम कुमार गुप्ता, पूर्वअध्यक्ष गौतम गुप्ता र सेराज खानलगायतले वातावरण जोगाउन वृक्षारोपणको विशेष महत्व रहेको धारणा राख्नुभएको थियो । कार्यक्रम संयोजक प्रियाबन्ध न्यौपानेले आगामी दिनमा पनि यस्ता वातावरणमैत्री कार्यक्रमलाई निरन्तरता दिइने जानकारी दिनुभयो ।
