परासी । नवलपरासी (बर्दघाट सुस्ता पश्चिम) मा प्रहरीले एक नाले भरुवा बन्दुक र बारुद सहित दुई जनालाई पक्राउ गरेको छ । बर्दघाट नगरपालिका वडा नं. ४ शिवशक्ती टोलमा आफ्नै घर अगाडि बन्दुक पड्काएर जङ्गलतर्फ जाँदै गरेको अवस्थामा उनीहरूलाई प्रहरीले नियन्त्रणमा लिएको हो ।
पक्राउ पर्नेमा स्थानीय ४३ वर्षीय विजय पौडेल र वडा नं. २ चिसापानी बस्ने ५० वर्षीय बखत राना रहेका छन् । पौडेलले घर अगाडि बन्दुक पड्काएर साथीसँग पारिजात जङ्गलतर्फ गएको स्थानीयको सूचनाका आधारमा जिल्ला र इलाका प्रहरी कार्यालय बर्दघाटको संयुक्त टोली परिचालन गरिएको थियो ।
प्रहरीले उनीहरूलाई बर्दघाट-४ मर्चाघोलाबाट नियन्त्रणमा लिएको हो । खानतलासका क्रममा पौडेलको साथबाट १ थान भरुवा बन्दुक र रानाको साथबाट ७४ वटा छर्रा तथा २ बट्टा बारुद बरामद भएको छ । पक्राउ परेका दुवै जनालाई नवलपरासी जिल्ला अदालतबाट म्याद थप गरी हिरासतमा राखेर अनुसन्धान भइरहेको जिल्ला प्रहरी कार्यालयका सूचना अधिकारी प्रहरी निरीक्षक सोम दास ढकालले जानकारी दिनुभयो ।
