रौतहट । प्रादेशिक अस्पताल गौरमा दरबन्दी कायम भई लामो समयदेखि अन्यत्र काजमा रहेका पाँच जना विशेषज्ञ चिकित्सक आफ्नो दरबन्दीमा फर्किएका छन् । प्रदेश सरकारले दरबन्दी कायम रहेकै अस्पतालमा चिकित्सकलाई अनिवार्य रूपमा फर्काउन कडाइ गरेपछि बालरोग, एनेस्थेसिया, रेडियोलोजी, मानसिक रोग र मेडिसिनतर्फका विशेषज्ञ चिकित्सक यसै साता अस्पतालमा हाजिर भएका हुन् ।
अस्पताल स्रोतका अनुसार दरबन्दी गौरमा भए पनि कतिपय चिकित्सक एक वर्षभन्दा बढी समयदेखि आफूलाई अनुकूल हुने स्थानमा काजमा कार्यरत रहँदा अस्पतालको विशेषज्ञ सेवा प्रभावित हुँदै आएको थियो । दरबन्दीका चिकित्सक फर्किएसँगै जटिल प्रकृतिका बिरामीको प्रारम्भिक परीक्षण तथा उपचार गौरमै सम्भव भई अन्यत्र जानुपर्ने बाध्यता हट्ने अपेक्षा प्रशासनले लिएको छ । कुनै समय ‘रेफर सेन्टर’का रूपमा चिनिएको यो अस्पतालमा विशेषज्ञ सेवा सुरु भएपछि सर्वसाधारणले प्रत्यक्ष लाभ पाउनेछन् ।
