भैरहवा । भारतको प्रयागराजमा लागेको महाकुम्भमा सहभागी हुन गएका नेपालीहरुको गाडी भारतमा दुर्घटना हुदा ३ जनाको मृत्यु भएको छ । जिल्ला प्रहरी रुपन्देहीका प्रमुख प्रहरी उपरिक्षक रञ्जित सिंह राठौरका अनुसार मृत्यु हुनेमा रुपन्देही जिल्ला देवदह नगरपालिका वडा नम्बर ९ भलुहिका ४५ वर्षिय गणेश खनाल, उनको श्रीमति ४० वर्षिय दिपा खनाल र सोही ठाउ बस्ने ४५ वर्षिय गिता शर्मा रहेका छन् ।
महाकुम्भबाट स्नान गरि फर्किने क्रममा आजमगढ नजिकै गाडी बाटो छेउको डिभाईडरमा ठोक्किएर दुर्घटना भएको हो । दुर्घटनामा परि अन्य ५ जना घाईते भएका छन् । चालक सहित गाडीमा ८ जना सवार रहेको राठौरले बताए । घाईतेहरुको भने भारतकै आजमगढ र गोरखपुरमा उपचार भईरहेको छ । घाईतेहरुमा चालक भारत बस्ने २१ वर्षिय ऋतिक दुबे, देवदह नगरपालिका वडा नम्बर ९ कै २२ वर्षिय शुभम पोखरेल, ३५ वर्षिय देवकला देवी, २५ वर्षिय अविशंकर रहेका छन् ।
रुपन्देहीको देवदह नगर पालिका वडा नम्बर ९ का ३५ जनाको टोली भारतमा लागेको कुम्भ मेलामा स्नान गर्न गएका थिए । ५ वटा कारमा सवार यो टोली फर्किने क्रममा बनारस–आजमगढ राजमार्गमा रानी सराय थाना क्षेत्रमा दुर्घटना भएको एसपी राठौरले बताए । मृतकहरुको शव स्थानिय अस्पतालमा पोष्टमार्टमको लागि गएको बताउदै एसपी राठौरले आफुहरु नियमित भारतिय प्रहरीको सम्पर्कमा रहेको जानकारी दिए । घटनाबारे नेपाल प्रहरीले विहान ८ बजे मात्र थाहा पाएको थियो ।
