पाल्पा । पाल्पाको तिनाउ गाउँपालिका–३ स्थित तिनाउ खोलामा नुहाउने क्रममा दुई जना भारतीय युवा डुबेर बेपत्ता भएका छन्। भारतको सन्तबिर नगरबाट सात जनाको समूहमा नेपाल भ्रमणमा आएका युवाहरूमध्ये दुई जनालाई दिउँसो करिब २:०० बजेको समयमा खोलाले बगाएको हो।
जिल्ला प्रहरी कार्यालय पाल्पाका अनुसार बेपत्ता हुनेहरूमा १७ वर्षीय फरान अन्सारी र सोही उमेरका अमान अन्सारी रहेका छन्। साथीहरूसँगै उक्त स्थानमा घुम्न पुगेका उनीहरू खोलामा नुहाउन पसेका बेला अचानक डुबेर बेपत्ता भएका हुन्।उनीहरूसँगै आएका अन्य पाँच जना साथीहरू भने घटना स्थलमा सुरक्षित रहेका छन्। बेपत्ता भएका युवाहरूको खोजीका लागि प्रहरी र स्थानीय बासिन्दाहरूले सक्रियतापूर्वक कार्य गरिरहेका छन्।
जिल्ला प्रहरी कार्यालय पाल्पाका सूचना अधिकारी एवं प्रहरी नायव उपरीक्षक होम प्रकाश चौधरीले घटनाको पुष्टि गर्दै बेपत्ताहरूको खोजी कार्य जारी रहेको जानकारी दिनुभएको छ। खोजीका लागि आवश्यक समन्वय भइरहे तापनि हालसम्म उनीहरूको अवस्था अज्ञात रहेको प्रहरीले जनाएको छ।
