भैरहवा । नेपालको सीमा नाका हुँदै भारततर्फ भइरहेको अवैध तस्करीको अर्को प्रमाण बाहिर आएको छ। नेपालबाट गैरकानुनी रूपमा लगिँदै गरेको १५१ बोरा फर्सीको बीउ र टाटा ट्रकसहित दुई जनालाई सीमा सुरक्षा बल (एसएसबी) ले नियन्त्रणमा लिएको छ। विशेष सुराकीका आधारमा भारतको नौतनवास्थित चन्डीथान टोल प्लाजा नजिकै ६६ औँ वाहिनी एसएसबीको टोलीले सोनौलीबाट आउँदै गरेको ट्रकलाई घेराबन्दी गरी पक्राउ गरेको हो।
जाँचका क्रममा वैध कागजात नभेटिएपछि भारतको बस्ती जिल्ला निवासी चालक सचिन चौधरी र अरबिन्द चौधरीलाई हिरासतमा लिइएको छ। अनुसन्धान अनुसार उक्त ट्रक कपिलवस्तुको कृष्णनगर भन्सार नाकाबाट नेपाल प्रवेश गरी रूपन्देहीको बेलहिया नाका हुँदै पुनः भारत फर्किएको थियो, जहाँ सोनौलीमा एक नेपाली चालकले उनीहरूलाई ट्रक सुम्पिएका थिए। कडा सुरक्षा जाँचका बाबजुद दुवै देशका नाकाबाट तस्करीको ट्रक सहजै पार हुनुले सुरक्षा निकायको लापरवाही वा मिलेमतोको आशङ्का जन्माएको छ। बरामद सामान र अभियुक्तहरूलाई थप कानुनी कारबाहीका लागि नौतनवा कस्टम कार्यालयमा बुझाइएको छ।
