अर्घाखाँची । अर्घाखाँचीको भूमिकास्थान नगरपालिका–७ छिन्दीखोलास्थित धनचौर–नुवाकोट भित्री सडकखण्डमा विद्यार्थी बोकेको जिप दुर्घटना हुँदा चालकको मृत्यु भएको छ भने १४ जना विद्यार्थी घाइते भएका छन् । जन जागृती माध्यमिक विद्यालय धनचौरबाट राष्ट्रपति रनिङ शिल्ड प्रतियोगितामा सहभागी हुन नुवाकोटतर्फ जाँदै गरेको लु २ च ५१७९ नम्बरको जिप दुर्घटनामा परेको हो ।
प्रहरीका अनुसार उक्त जिप घुम्तीमा ब्याक गर्ने क्रममा सडकबाट करिब ५० देखि ६० मिटर तल खसेको थियो । दुर्घटनामा परी गम्भीर घाइते भएका जिप चालक भूमिकास्थान–१० पाकु बस्ने ४५ वर्षीय रुद्रबहादुर पुन मगरको उपचारका क्रममा जिल्ला अस्पताल सन्धिखर्कमा मृत्यु भएको छ । अस्पताल पुर्याएलगत्तै दिउँसो १२:२० बजे चिकित्सकले उनलाई मृत घोषणा गरेका थिए ।
जिपमा सवार १८ जनामध्ये १५ जना घाइते भई उपचारका लागि जिल्ला अस्पताल सन्धिखर्क लगिएको थियो । घाइतेहरूमध्ये टाउकोमा चोट लागेका १६ वर्षीय विप्लव पुनसहित ३ जनालाई थप उपचारका लागि बुटवल रिफर गरिएको छ । अन्य घाइते विद्यार्थीहरू वर्षा राना, शेषकान्त गैरे, अमिसा खनाल, विकास पेन्नी, रितु घर्ति मगर लगायतको अवस्था सामान्य तथा मध्यम रहेको र उनीहरूको जिल्ला अस्पतालमै उपचार भइरहेको छ ।
दुर्घटनाको खबर प्राप्त हुनासाथ अस्थायी प्रहरी पोष्ट धनचौर र जिल्ला प्रहरी कार्यालय अर्घाखाँचीबाट प्रहरी टोलीले घाइतेहरूको तत्काल उद्धार गरी अस्पताल पठाएको थियो ।
