रामेछाप । रामेछापको दोरम्बा शैलुङ गाउँपालिका–१ डडुवाका सीमान्तकृत अल्पसङ्ख्यक थामी समुदायले तिहारमा देउसी खेलेर उठाएको रकम विद्यालय सञ्चालनको लागि चन्दा दिएका छन् ।
निको थामी सेवा समाज रामेछाप डडुवाले गएको तिहारमा देउसी खेलेर सङ्कलन गरेको रकम विद्यालय सञ्चालनको लागि सहयोग गरेको छ । डडुवाको सल्लेटार, दलेचौर पाखाटोल, नागी, मझुवा लगायतका क्षेत्रमा द्यौसी खेलेर सङ्कलन गरेको रकम विद्यालयमा एक कार्यक्रम आयोजना गरी थामी समुदायले मंगलबार स्थानीय सञ्जीवनी मावि पात्लेलाई हस्तान्तरण गरेका हुन् ।
गएको तिहारमा देउसी खेलेर थामी समुदायले १ लाख ३९ हजार ७ सय ८० रुपैँया सङ्कलन गरेका थिए । सोही रकम वडाका जनप्रतिनिधिहरू समेतको रोहवरमा विद्यालय व्यवस्थापन समिति अध्यक्ष विष्णुकुमार लामालाई हस्तान्तरण गरिएको वडा सदस्य समेत रहेका थामी समुदायका अगुवा मङ्गले थामीले जानकारी दिए ।
सञ्जीवनी माविमा सरकारले दरबन्दि अनुसारको शिक्षक व्यवस्था गर्न सकेको छैन । त्यसैले विद्यालयले निजी श्रोतमा शिक्षक राखेर पठन पाठन गरिरहेको छ । विद्यालयसँग निजी श्रोतका शिक्षकलाई तलब खुवाउन रकम अभाव भएपछि देउसी खेलेर सङ्कलन गरेको रकम सहयोग गरेको थामीले बताए ।
दुर्गमको यो थामी बस्ती यस वर्ष बाढी पहिरोको चपेटामा प¥यो । भदौ र असोज महिनामा परेको भीषण वर्षाको कारण गाउँ पहिरो गएर थिलथिलो भयो । धेरैका घर जोखिममा परे । बारीमा लगाएको बाली पहिरोले पु¥यो । गाउँ संकटमा छ ।
उनीहरूले विद्यालयलाई परेको सङ्कटको अगाडि आफूहरूलाई परेको सङ्कट गौण ठाने । त्यसैले देउसी खेलेको पैसा विद्यालयलाई सहयोग गरे ।
‘आफ्नै बालबच्चा पढ्ने विद्यालय, शिक्षकलाई तलब खुवाउने पैसा नभएपछि सहयोग ग¥यौँ, अलि अगाडि नै दिने सोच थियो, बाढी पहिरोले क्षति भएको आफ्नै घर व्यवहार मिलाउन लागेकोले केही ढिलो भयो’, मङ्गलेले भने ।
