कञ्चन, रुपन्देही । रुपन्देहीको कञ्चन गाउँपालिकामा भूमि सम्बन्धी समस्यालाई प्रभावकारी रूपमा समाधान गर्न बिहीबार एक सर्वदलीय बैठक सम्पन्न भएको छ । बैठकमा सहभागी राजनीतिक दलका प्रतिनिधिहरूले भूमिहीन सुकुमवासी, भूमिहीन दलित र अव्यवस्थित बसोबासीहरूलाई जग्गाधनी पूर्जा वितरण प्रक्रियालाई तीव्रता दिन र आउन सक्ने चुनौतीहरूको संयुक्त रूपमा सामना गर्न ऐक्यबद्धता जनाएका छन् ।
गाउँपालिकाका अध्यक्ष नवराज ढकालको अध्यक्षतामा बसेको बैठकमा उहाँले वडा नं. ५ का ४४३ परिवारलाई जग्गाधनी पुर्जा वितरणमा भएको प्रगति, चुनौती र समाधानका लागि भएका प्रयासबारे जानकारी गराउनुभयो। उहाँले भूमिहीन दलित र सुकुम्बासीहरूलाई अव्यवस्थित बसोबासीको श्रेणीमा सार्ने कानुनी जटिलता र समाधानका उपायबारे पनि प्रकाश पार्नुभयो। अध्यक्ष ढकालले समाजमा छरिएका भ्रमहरूलाई चिर्न सबै पक्षबाट प्राप्त सहयोगप्रति धन्यवाद व्यक्त गर्नुभयो ।
बैठकमा विभिन्न राजनीतिक दलका प्रतिनिधि तथा सरोकारवालाहरूले भूमिसम्बन्धी अन्यौल हटाउन र राजस्व भुक्तानी प्रक्रियालाई सरलीकृत गर्न अध्यक्ष ढकाललाई सुझाव दिएका थिए। उनीहरूले पालिकाको भूमि सम्बन्धी कुनै पनि समस्या समाधानका लागि एकताबद्ध भएर अघि बढ्ने प्रतिबद्धता व्यक्त गरे।
