भैरहवा । नेपाल प्रहरी प्रदेश कार्यालय भैरहवा, रुपन्देहीमा कार्यरत प्रहरी निरीक्षक कृष्णप्रसाद घिमिरे साउन महिनाको उत्कृष्ट प्रहरी ('पुलिस अफ द मन्थ') घोषित हुनुभएको छ। सांगठनिक नीति–निर्देशनबमोजिम पेसागत जिम्मेवारी र पदीय दायित्व पूर्ण व्यावसायिकताका साथ निर्वाह गरेको भन्दै कार्यालय प्रमुख प्रहरी वरिष्ठ उपरीक्षक (एसएसपी) दीपक पोखरेलले उहाँलाई पुरस्कृत गर्नुभएको हो।
घिमिरेले कार्यालयको केन्द्रीय अनुसन्धान इकाई, साइबर इकाई तथा दूरसञ्चार समन्वय शाखा प्रमुखका रूपमा जिम्मेवारी उत्कृष्ट ढंगले सम्पादन गर्दै आउनुभएको छ। मातहतका प्रहरी इकाईहरूबाट अनुरोध भएबमोजिम घटनास्थलमा खटिएर अनुसन्धानमा सहयोगी भूमिका निर्वाह गर्नुका साथै दूरसञ्चार समन्वय शाखामार्फत अपराध अनुसन्धानमा आवश्यक प्राविधिक सहायता प्रदान गरेको, दैनिक कार्यसम्पादन, शाखाको अभिलेखीकरण तथा स्वीकृत कार्ययोजनाअनुसारका निर्धारित क्रियाकलापहरू प्रभावकारी रूपमा सञ्चालन गरेको भन्दै उहाँलाई उत्कृष्ट प्रहरी छनोट गरिएको नेपाल प्रहरी प्रदेश कार्यालय भैरहवाले जनाएको छ।
