धनगढी । सशस्त्र प्रहरी बल नेपाल, नं ३४ गण हेडक्वार्टर धनगढी, कैलालीमा आयोजित तालिममा सुरक्षाकर्मीहरूका लागि मानव अधिकार र सुरक्षा व्यवस्थापनसम्बन्धी प्रशिक्षण कार्यक्रम सम्पन्न भएको छ। राष्ट्रिय मानव अधिकार आयोग सुदूरपश्चिम प्रदेश कार्यालयका प्रमुख सहसचिव प्रकाश दत्त भट्टले सहजीकरण गर्नुभएको सो कार्यक्रममा सुरक्षाकर्मीहरूलाई आधारभूत मानव अधिकारको रक्षा, शान्तिसुव्यवस्था, सुशासन र नागरिक स्वतन्त्रताको संरक्षणसम्बन्धी विषयमा प्रशिक्षण दिइएको थियो।
कार्यक्रममा मानव अधिकारसम्बन्धी छैटौँ राष्ट्रिय कार्ययोजना, स्थानीय प्रशासन ऐन, मुलुकी अपराध संहिताअन्तर्गतका सार्वजनिक शान्तिका कसूर तथा सशस्त्र प्रहरी नियमावलीमा उल्लेखित मानव अधिकार र लैङ्गिक संवेदनशीलताका विषयमा विस्तृत छलफल गरिएको थियो। साथै, नेपालको संविधानमा प्रदत्त नागरिकको कर्तव्य, राज्यका सुरक्षा नीतिहरू तथा नागरिक र सुरक्षा निकायबीचको आपसी समन्वय र विश्वासलाई अझ सुदृढ बनाउने विषयमा समेत विशेष जोड दिइएको थियो। उक्त तालिममा ५७ जना सुरक्षाकर्मीहरूको सहभागिता रहेको थियो।
