भैरहवा । लुम्बिनी प्रदेशका सीमा क्षेत्रमा हुने आपराधिक गतिविधि, अवैध चोरी-निकासी तथा पैठारी नियन्त्रणका लागि नेपाल र भारतका सशस्त्र प्रहरीबीच सूचना आदानप्रदान र सहकार्य गर्ने सहमति भएको छ । रुपन्देहीको लुम्बिनीमा सम्पन्न सशस्त्र प्रहरी बल, नेपाल र भारतको सशस्त्र सीमा बल (एसएसबी) बीचको दशौँ डीआईजीस्तरीय समन्वयात्मक बैठकले उक्त समझदारी गरेको हो ।
सशस्त्र प्रहरी बल विन्ध्यवासिनी बाहिनीका बाहिनीपति डीआईजी दीपक अधिकारी र भारतीय एसएसबीका उपमहानिरीक्षक बी. विक्रमनको नेतृत्वमा भएको बैठकमा सीमा स्तम्भको मर्मत, मानव तस्करी, नक्कली मुद्रा ओसारपसार, लागुऔषध नियन्त्रण तथा तेस्रो देशका नागरिकको गैरकानुनी प्रवेशमा कडा निगरानी राख्ने निर्णय भएको छ । साथै, दशगजा क्षेत्रमा संयुक्त गस्ती गर्ने र दुई देशबीच खेलकुद तथा सामाजिक गतिविधिलाई निरन्तरता दिने विषयमा पनि छलफल भएको छ ।
