कपिलवस्तुमा करिब १ करोड ८० लाख बराबरको अवैध सामानसहित ३ भारतीय टेलर र चालक पक्राउ

कपिलवस्तु । कपिलवस्तु प्रहरीले करिब रु १ करोड ८० लाख मूल्य बराबरको बिलबिजकभन्दा बढी परिमाणमा सामान बोकेका तीनवटा भारतीय टेलर र तीनजना चालकलाई पक्राउ गरेको छ । जिल्ला प्रहरी कार्यालय कपिलवस्तुका अनुसार, गोप्य सूचनाका आधारमा मायादेवी गाउँपालिका वडा नं. १ बाट प्रहरीले छापा मारी UP 51 BT 3932, HR 69 E 9039 र HR 58 B 8687 नम्बरका टेलरहरूलाई नियन्त्रणमा लिएको हो ।

चेकजाँचका क्रममा, एउटा टेलरबाट रु २६ लाखभन्दा बढी मूल्यको De-Oiled Cake (Poultry Feeds), अर्कोबाट रु ५३ लाखभन्दा बढीको Basmati Rice र तेस्रो टेलरबाट रु २५ लाखभन्दा बढीको SOYA DOC बरामद भएको छ । बरामद गरिएका सामानको कुल मूल्य रु १ करोड ५ लाख १४ हजार १६९ र टेलरको मूल्य रु ७५ लाख गरी जम्मा रु १ करोड ८० लाख १४ हजार १६९ पुगेको छ । पक्राउ परेका चालक र टेलरहरूलाई थप अनुसन्धान तथा कारबाहीका लागि राजश्व अनुसन्धान कार्यालय बुटवल, रुपन्देही पठाइएको जिल्ला प्रहरी कार्यालय कपिलवस्तुका प्रवक्ता रिपेन्द्र कुमार सिंहले जानकारी दिए।