काठमाडौं । अख्तियार दुरुपयोग अनुसन्धान आयोगले नवलपरासीको पाल्हीनन्दन गाउँपालिकाका पूर्वअध्यक्ष बैजु प्रसाद गुप्ताविरुद्ध गैरकानुनी सम्पत्ति आर्जन गरी भ्रष्टाचार गरेको आरोपमा विशेष अदालतमा मुद्दा दायर गरेको छ । गुप्ताले वि.सं. २०७४ असारदेखि पाँच वर्ष गाउँपालिकाको अध्यक्ष रहँदा साढे तीन करोड रुपैयाँभन्दा बढी गैरकानुनी रूपमा आर्जन गरेको अख्तियारको दाबी छ ।
सो अवधिमा उनको कुल सम्पत्ति ६ करोड ९७ लाख रुपैयाँ पाइएकोमा ३ करोड ५१ लाख रुपैयाँ मात्रै वैध आम्दानी देखिएको र बाँकी ३ करोड ४५ लाख रुपैयाँको स्रोत नखुलेकाले सोही रकम बराबरको बिगो मागदाबी गर्दै मुद्दा दायर गरिएको हो । अध्यक्ष पदमा रहँदा गैरकानुनी रूपमा कमाएको सम्पत्ति परिवारका सदस्य र नातेदारका नाममा लुकाएको अभियोगमा अख्तियारले गुप्तासहित उनका बुबा वंशराज गुप्ता, आमा धानमती तेली तथा श्रीमतीहरू शारदा आचार्य गुप्ता र सुलोचना गुप्तालाई पनि सम्पत्ति जफत गर्ने प्रयोजनका लागि प्रतिवादी बनाएको छ ।
