भैरहवा । जिल्ला प्रहरी कार्यालय रुपन्देहीले चाडपर्वलाई लक्षित गर्दै सुरक्षा व्यवस्था कडा पारेको छ । यसै क्रममा प्रहरीले जिल्लाका विभिन्न स्थानबाट १० लाख ५७ हजार ५०० रुपैयाँ बराबरको भन्सार छलीका सामान बरामद गरेको छ ।
जिल्ला प्रहरी कार्यालय तथा मातहतबाट खटिएको टोलीले गरेको विशेष जाँच अभियानका क्रममा कोइलर र ब्रोइलर कुखुरा, फूल, भैँसी, पाडी, तथा ती सामान ढुवानी गर्न प्रयोग गरिएका मोटरसाइकल र पिकअप गाडी नियन्त्रणमा लिएको हो । बरामद गरिएका सबै सामान भैरहवा भन्सार कार्यालय र पशु क्वारेन्टाइन कार्यालय बेलहिया पठाइएको जिल्ला प्रहरीका नायब उपरीक्षक सुरज कार्कीले जानकारी दिए ।
प्रहरीले भन्सार छली गरी सामान ल्याउने कार्यमा संलग्न चार जनालाई पनि पक्राउ गरेको छ । पक्राउ पर्नेमा ओमसतिया गाउँपालिका–४ वसन्तपुरका ३२ वर्षीय सराफत अलि, भारतको उत्तर प्रदेश जिल्ला महाराजगञ्ज थाना नौतनवा बस्ने ३१ वर्षीय शिवकुमार कोइरी, सोही स्थानका ४० वर्षीय बब्लु कुशवार र मर्चवारी गाउँपालिका–३ रायपुरका अन्दाजी २८ वर्षीय जगदेव भुज रहेका छन् ।
रुपन्देहीमा अहिले सात सयभन्दा बढी प्रहरी परिचालन गरिएको छ । जिल्ला प्रहरी प्रमुख प्रहरी उपरीक्षक प्रदिप बहादुर क्षेत्रीले चाडपर्वको समयमा हुन सक्ने कुनै पनि गलत क्रियाकलापलाई नियन्त्रण गर्न प्रहरी कटिबद्ध रहेको र गलत काम गर्नेलाई कुनै पनि हालतमा नछाड्ने बताए । प्रहरी उपरीक्षक क्षेत्रीको नेतृत्वमा रुपन्देहीमा तस्करी, अपराध नियन्त्रण र शान्ति सुरक्षा सुदृढीकरणमा उल्लेख्य प्रगति हासिल भएको छ ।
उनी आएदेखि नै तस्करी लगायतका आपराधिक गतिविधिमाथि कडा निगरानी राखिएको कारण यस्ता गैरकानुनी कारोबारीहरू सफल हुन सकेका छैनन्, जसले गर्दा जिल्लामा शान्ति सुरक्षाको अवस्था मजबुत बनेको छ । प्रहरीको यस सक्रियताले चाडपर्वको समयमा हुने सम्भावित अपराध र गैरकानुनी गतिविधिहरू नियन्त्रणमा ठूलो सहयोग पुग्ने अपेक्षा गरिएको छ ।
