इलाम । इलामको माइ नगरपालिका वडा नम्बर ७ मा ४० करोड लागतको फाल्गुनन्द सडक जोडने आत्मानन्द मार्ग निर्माण अन्तिम चरणमा पुगेको छ । वडाध्यक्ष बुद्धीप्रसाद खनालका अनुसार वडा नम्बर ७ भित्र बैशाख अगाडि सडक पक्की भइसक्नेछ ।
वडाध्यक्ष खनालकै पहलमा संघीय निर्वाचन क्षेत्र रणनीतिक सडक अन्तर्गत बजेट विनियोजन भइ निर्माण भइरहेको सडक उक्त क्षेत्रको महत्वकांक्षी योजना हो । माई नगरपालिक–७ लक्ष्मी बाँधदेखि किरात धर्मगुरु आश्रम रहेको लारुम्बाबाट दायाँ हुँदै फाल्गुनन्द सडक जोड्ने उक्त कालोपत्रे सडक १८ किलोमिटर छ । हाल नौं किलोमिटर सडक पक्की गर्ने काम अन्तिम चरणमा रहेको अध्यक्ष खनालले जानकारी दिए ।
गतबर्ष जेठमा महमाईकी जेष्ठ स्वास्थ्यसेविका चन्द्रकला दहाल र वडाध्यक्ष खनालले सडकको शिलन्यास गर्दै निर्माणको औपचारिक शुरुवात गरेका थिए । दुई बर्षभित्र सम्पन्न गर्नेगरी हिम्दुङ एण्ड थोकर कम्पनी र भट्टराई जेबिले सडक निर्माणको ठेक्का पारेको थियो ।
कालोपत्रे सडक निर्माणपछि महमाई, लारुम्वा, चिसोपानी, ईभाङ, रवि, जितपुर, सिद्धिथुम्कालगायत पश्चिमी इलामका हजारौ नागरिकलाई झापा बिर्तामोड सम्मको ब्यापार, स्वास्थ्य उपचार, यात्रालगायत सहजता हुने वडाध्यक्ष खनालले जानकारी दिए ।
संघीय निर्वाचन क्षेत्र अन्तर्गत एक निर्वाचन क्षेत्र भएको जिल्लामा ६० करोड, दुई निर्वाचन क्षेत्र भएको जिल्लामा ४० करोड, दुई भन्दा बढी निर्वाचन क्षेत्र भएको जिल्ला मा २५ करोड विनियोजन गर्ने सरकारी निर्णय अनुसार ठूलो पहलमा उक्त बजेट आफ्नो क्षेत्रमा सफल भएको पनि वडाध्यक्ष खनालले जानकारी दिए ।
