भैरहवा । सशस्त्र प्रहरीले रुपन्देहीको सिद्धार्थनगर नगरपालिका–१, डण्डास्थित चेकप्वाइन्टबाट अवैध रूपमा भन्सार छली भारतबाट नेपालतर्फ ल्याउँदै गरेको खाद्यान्न र मदिरा बरामद गरेको छ । सशस्त्र प्रहरी बल नेपाल सीमा सुरक्षा गुल्म हेडक्वार्टर डण्डाबाट सशस्त्र प्रहरी नायव निरीक्षक गणेश बहादुर रोका मगरको कमाण्डमा खटिएको चेकप्वाइन्ट टोलीले चेकजाँच गर्ने क्रममा उक्त सामान बरामद गरेको हो ।
चेकजाँचका क्रममा भारतबाट अवैध रूपमा ल्याइँदै गरेको अन्दाजी मूल्य रु ५२ हजार ७ सय ७० बराबरको खाद्यान्न र अन्दाजी मूल्य रु ८० हजार बराबरको ९० बोतल इन्डियन रम बरामद गरिएको छ । कुल १ लाख ३२ हजार ७ सय ७० रुपैयाँ बराबरको भन्सार छलीका ती सामानहरू आवश्यक कारबाहीका लागि भन्सार कार्यालय बुझाउने प्रक्रियामा रहेको सीमा सुरक्षा गुल्म डण्डाका प्रमुख, सशस्त्र प्रहरी नायव उपरीक्षक गोपिकृष्ण भट्टराईले जानकारी दिनुभएको छ ।
