बाजुरा । बाजुराको बडिमालिका नगरपालिकामा पोखरीमा नुहाउने क्रममा डुबेर एक बालिकाको दुःखद मृत्यु भएको छ। बडिमालिका नगरपालिका वडा नम्बर १ सल्याना गाउँ बस्ने कित्तु कार्कीकी १४ वर्षीया छोरी भावना कार्कीको पोखरीमा डुबेर मृत्यु भएको हो। आइतबार साँझ अन्दाजी ७:३० बजेको समयमा पोखरीमा नुहाउने क्रममा उनी अचानक डुबेर बेहोस भएकी थिइन्। बेहोस अवस्थामा फेला परेकी बालिकालाई उनका दाजु वीरभाने कार्कीले तत्कालै उद्धार गरी उपचारका लागि जिल्ला अस्पताल मार्तडी पुर्याएका थिए। अस्पताल पुर्याएर चिकित्सकहरूले उपचार सुरु गरेको केही बेरमै उनलाई मृत घोषणा गरेका थिए।
जिल्ला प्रहरी कार्यालय बाजुराका प्रवक्ता प्रहरी निरीक्षक नरेशबहादुर शाहीका अनुसार मृतक बालिकाको शवलाई अहिले जिल्ला अस्पताल मार्तडीमै राखिएको छ। उक्त शवको भोलि पोस्टमार्टम गरिने र त्यसपछि कानुनी प्रक्रिया पूरा गरी परिवारको जिम्मा लगाइने प्रहरीले जनाएको छ। घटना भएको उक्त स्थान जिल्ला प्रहरी कार्यालय बाजुराबाट पैदल दुरीमा अन्दाजी १ घण्टा ३० मिनेट दक्षिण-पश्चिम क्षेत्रमा पर्दछ। घटनाका सम्बन्धमा प्रहरीले थप अनुसन्धान गरिरहेको प्रहरीले जनाएको छ।
