भैरहवा । रुपन्देहीमा आइतबार विभिन्न कार्यक्रमसहित निजामती सेवा दिवस मनाइएको छ । यस अवसरमा आयोजित प्रभातफेरी कार्यक्रमलाई सम्बोधन गर्दै प्रमुख जिल्ला अधिकारी डा. टोकराज पाण्डेयले कर्मचारीहरूलाई प्रभावकारी सेवा प्रवाह मार्फत नागरिकको मन जित्न आग्रह गर्नुभयो ।
उहाँले कर्मचारीहरूले आफ्नो पोशाक र परिचयपत्रको गरिमा राख्दै समाजमा राम्रो छवि निर्माण गर्नुपर्नेमा जोड दिनुभयो । पछिल्लो समय एकअर्कालाई दोषारोपण गर्ने प्रवृत्ति बढेको भन्दै उहाँले सीमित स्रोतसाधनका बाबजुद पनि नागरिकलाई अधिकतम सेवा प्रदान गरी उनीहरूको विश्वास जित्न आग्रह गर्नुभयो । डा. पाण्डेयले निजामती सेवाले महिला, अपाङ्ग, मधेशी, अल्पसंख्यक लगायत सबै वर्गलाई समेटेको बताउनुभयो ।
कार्यक्रममा कोटहीमाई गाउँपालिकाका प्रमुख प्रशासकीय अधिकृत अजय मिश्रले संघीय निजामती सेवा ऐनले प्रदेश र स्थानीय तहका कर्मचारीहरूको भावनालाई पनि समेट्नुपर्नेमा जोड दिनुभयो । उहाँले स्थानीय तहका कर्मचारीका पीडा बुझेर समाधान गर्न संघीय सरकारलाई आग्रह गर्नुभयो । विसं २०६१ सालदेखि हरेक वर्ष भदौ २२ गते मनाइँदै आएको निजामती सेवा दिवसका अवसरमा सरसफाई, स्वास्थ्य शिविर, रक्तदान लगायतका सामाजिक कार्यक्रमहरू पनि आयोजना गरिने गरिएको छ ।
